赶客CV八大特质 你又中几多样?

 

做我地呢行,阅「历」无数,睇CV多过你睇电视。你问点解send左咁多间都无回音?睇下你份CV中唔中以下赶客特质先啦。

 

  1. 无proofread

唔少CV一睇就知无proofread过,grammar错,串字错,一时大楷一时细楷。比D诚意,send之前proofread一次又好,用英文文法检查软体又好,搞搞佢。

 

  1. 无转PDF

我地收到无转PDF嘅word档案都知不妙:两个情况,一系format “tun”位,二系变哂怪兽字。CV最好都系转做PDF先send,尤其系用mac机嘅朋友。

 

  1. 量多于质

好多求职者以为越多越好,于是copy & paste,将job duties无限loop,用几个同一意思嘅vocab解释。得个「多」字,其实我地更讲求职者嘅「质」。

 

  1. 过份精简

小编试过收到份CV,全版夹埋都唔够六行。Fresh grad经验唔多可以理解,明知自己唔够野放落CV,可以写多D job description或者final year project嘅内容等等。

 

  1. 骑呢email address

强烈建议求职者开番个正正常常嘅email,每次收到D咩 “keroro1220@xxx.com” “marylittlestar@xxx.com” 嘅CV,都会成为同事间茶余饭后嘅笑话。

 

  1. 无关工作经验/奖项

我地无需要了解你做过M记/uniqlo暑期工,更加无兴趣知道你攞过大胃王冠军定系中学做过班长。

 

  1. 过分单调

唔系要你做份艺术品出黎,但成版纸密密麻麻嘅Times New Roman,谂起都密集恐惧症发作。加D颜色,转下字体,咁咪靓仔番哂啰。

 

  1. 缩写无转全名

钟意用缩写whatsapp够快,小编都钟意。但而家唔系同兄弟倾计,系比你未来老细了解你。试过有CV公司名、职位、校名都简写几个英文字母,唔好default左我地会明。

正所谓人靠衣装,CV都靠包装㗎。下次搵工,执靓份CV先好send出去啦。