我地公司同事闲闲地每日做成百个面试（夸张法姐），见过唔少出色嘅求职者，骑呢嘅亦唔少。归纳同事们意见，小编得出面试七宗罪。
1. 一黎就讲钱
有D求职者一黎无耐就讲：「我上一份工有35K，年尾分埋花红㗎」，真系隔住部电话同个Mon都闻到一阵铜臭味。
2. 记错公司／老细名
我地绝对明白搵工梗系渔翁撒网，将自己份CV send几多得几多。唔该自己mark番边份打边份，唔系去到坐低嗌错老细名就老土啦。
3. 口水多过茶
唔少人黎见工好似十年无开过把口咁，问一句答十句。赠你一句：「讲重点啦」。天生健谈唔系错，但见工就唔太适宜吹水住，留返happy hour先啦。
4、过份被动
其实面试就好似选港姐咁，收收埋埋、平平无其嘅梗会比人foul出局。适当地表现自己，主动D讲下对公司嘅了解、期望同目标，至会比到好印象人。
5、不可一世
读过牛津剑桥，做过Big 4的确好叻仔叻女，我都戥你阿妈老怀安慰。知你叻猪啦，但有D野低调D好，唔系好容易比人觉得你不可一世。
6、踩旧公司／旧老细
人望高处，搵得工嘅梗系觉得自己可以比以前做得更加好。曾有求职者踩到旧公司旧老细一文不值，我地听到都唔知比咩反应好，只见佢个人素质都几高下。
7、吹嘘自己有几抢手
Recruiter有感：唔好讲到我唔请你系我损失咁，我地都有好多candidate选择㗎。
老老豆豆，呢D咁嘅基本野，好多小朋友in幼儿园都做到。下次见工前，谂谂佢，唔系见完一次就bye bye㗎啦。