BLOG

「有人幫你搵工都偷笑」趕客CV八大特質 你又中幾多樣?

做我地呢行,閱「歷」無數,睇CV多過你睇電視。你問點解send左咁多間都無回音?睇下你份CV中唔中以下趕客特質先啦。 無proofread 唔少CV一睇就知無proofread過,grammar錯,串字錯,一時大楷一時細楷。比D誠意,send之前proofread一次又好,用英文文法檢查軟體又好,搞搞佢。 無轉PDF 我地收到無轉PDF嘅word檔案都知不妙:兩個情況,一係format “tun”位,二係變哂怪獸字。CV最好都係轉做PDF先send,尤其係用mac機嘅朋友。 量多於質 好多求職者以為越多越好,於是copy & paste,將job duties無限loop,用幾個同一意思嘅vocab解釋。得個「多」字,其實我地更講求職者嘅「質」。 過份精簡 小編試過收到份CV,全版夾埋都唔夠六行。Fresh grad經驗唔多可以理解,明知自己唔夠野放落CV,可以寫多D job description或者final year project嘅內容等等。 騎呢email address 強烈建議求職者開番個正正常常嘅email,每次收到D咩 “keroro1220@xxx.com” “marylittlestar@xxx.com” 嘅CV,都會成為同事間茶餘飯後嘅笑話。 無關工作經驗/獎項 我地無需要了解你做過M記/uniqlo暑期工,更加無興趣知道你攞過大胃王冠軍定係中學做過班長。 過分單調 唔係要你做份藝術品出黎,但成版紙密密麻麻嘅Times New Roman,諗起都密集恐懼症發作。加D顏色,轉下字體,咁咪靚仔番哂囉。 縮寫無轉全名 鐘意用縮寫whatsapp夠快,小編都鐘意。但而家唔係同兄弟傾計,係比你未來老細了解你。試過有CV公司名、職位、校名都簡寫幾個英文字母,唔好default左我地會明。 正所謂人靠衣裝,CV都靠包裝㗎。下次搵工,執靚份CV先好send出去啦。

「分分鐘幼稚園學生都叻過你」面試七宗罪 即刻叮你出局

我地公司同事閒閒地每日做成百個面試(誇張法姐),見過唔少出色嘅求職者,騎呢嘅亦唔少。歸納同事們意見,小編得出面試七宗罪。 一黎就講錢 有D求職者一黎無耐就講:「我上一份工有35K,年尾分埋花紅㗎」,真係隔住部電話同個Mon都聞到一陣銅臭味。 記錯公司/老細名 我地絕對明白搵工梗係漁翁撒網,將自己份CV send幾多得幾多。唔該自己mark番邊份打邊份,唔係去到坐低嗌錯老細名就老土啦。 口水多過茶 唔少人黎見工好似十年無開過把口咁,問一句答十句。贈你一句:「講重點啦」。天生健談唔係錯,但見工就唔太適宜吹水住,留返happy hour先啦。 過份被動 其實面試就好似選港姐咁,收收埋埋、平平無其嘅梗會比人foul出局。適當地表現自己,主動D講下對公司嘅了解、期望同目標,至會比到好印象人。 不可一世 讀過牛津劍橋,做過Big 4的確好叻仔叻女,我都戥你阿媽老懷安慰。知你叻豬啦,但有D野低調D好,唔係好容易比人覺得你不可一世。 踩舊公司/舊老細 人望高處,搵得工嘅梗係覺得自己可以比以前做得更加好。曾有求職者踩到舊公司舊老細一文不值,我地聽到都唔知比咩反應好,只見佢個人素質都幾高下。 吹噓自己有幾搶手 Recruiter有感:唔好講到我唔請你係我損失咁,我地都有好多candidate選擇㗎。 老老豆豆,呢D咁嘅基本野,好多小朋友in幼稚園都做到。下次見工前,諗諗佢,唔係見完一次就bye bye㗎啦。